HEERLIKE CROISSANTS
Lang proses maar absoluut die moete werd.
- 4 koppies koekmeel
- ⅓ koppie witsuiker
- 1 pakkie kitsgis
- knippie sout
- 1 ¼ koppie botter
- 1 ¼ koppie lou melk (voeg meer by as deeg te styf is, maar onthou dit moet stywe deeg wees)
- 1 eier, geklits
Plaas meel, suiker, gis en sout in bak en meng deur.
Maak aan met melk tot ‘n deeg vorm. Knie vir paar minute. (Nie te veel nie, net so ± 5 minute).
Bedek met kleefplastiek en plaas in vrieskas vir 30 minute.
Sny botter in dun skywe. Rol deeg uit in reghoek van 25 x 50 cm.
Rangskik botter op deeg, maar hou kante oop van sowat 5 cm reg rondom.
Vou deeg op soos brief. Bedek weer met kleefplastiek en vries vir 30 minute.
Draai deeg 90 grade van vorige posisie en rol uit tot 25 x 50 cm. Vou soos voorheen en vries weer vir 30 minute.
Herhaal boonste stap nog 2 keer.
Na laaste vou bedek en plaas in yskas vir sowat 3 ure of meer.
Verdeel deeg in 2. Hou een deel verkoel terwyl jy ander deel sny en vorm.
Rol uit tot 25 x 50 cm. Sny kante gelyk. Sny in 4 gelyke vierkante. Sny nou twee driehoeke uit elkeen.
Trek en vorm tot jou driehoek een lang punt het. Sny klein snytjie in basis van driehoek en rol op in croissant vorm.
Plaas op gesmeerde bakplate.
Bedek liggies met kleefplastiek en laat rys 2 ure. Verf met geklitste eier.
Verhit oond tot 200°C. Sodra jy croissants insit, verlaag tot 180°C en bak tot bruin.
Ongeveer 16 – 24 minute.
Nota:
Ek het orige stukkies deeg sommer net opgerol en saam laat rys en bak.
Ek het Marvello margarien gebruik.
Resep geplaas deur Elaine Steyn Steyn
Foto: Elaine Steyn Steyn