HEEL SKAAPSNEK
“Dom Boer se koningsmaal vir die dag! Die drie skaapsnekke wat ek vanmiddag aan die troetelende koestering van die groot ysterpot toevertrou het, is nou amper-amper reg…almal moet tog net mooi verstaan dat ek so ‘n heel skaapsnekskenkel alleen eet omdat hy so voedsaam en gesond is; boordensvol heilsame en helende protiëne en vitamine en anti-oksidante en energie-opwekkers en harsingverhelderaars en prestasieverheffers en metabolismebevorderaars en sielvertroosters en lewenskragverbeteraars. Die feit dat hy boonop so versmoelend lekker smaak, is maar ‘n bloot toevallige newe-eienskap…‘n vermaning: sodra ‘n mens aan ‘n skaapsnek saag, kan jy hom maar weggooi of vir die honde kook. ‘n Skaapsnek is spesiaal doelgeskik ontwerp om net so heel in die ysterpot te kook en te potbraai met uie en speserye. As hy daar reg is (na so drie uur), kan jy hom met die mes en vurk op die bord takel (een nek per persoon), of wag tot hy koud is en dan ver eenkant in die veld op ‘n klip gaan sit en hom tydsaam met die knipmes kerf en oppeusel terwyl jy diep, vêr, digterlike gedagtes dink. Jy kan hom ook in ‘n plastieksakkie vries en dan een aand as jy nie lus of tyd het vir kosmaak nie laat ontdooi en opwarm vir ‘n koningsete. Miskien moet een van ons volk se digters een of ander tyd ‘n gedig skryf oor die deugde van die skaapsnek. Ek sou probeer, maar ek het nie nou tyd nie, want ek gaan nou eet…”
- 3 skaapsnekke
- uie, na smaak
- olie, klein bietjie, vir braai
- 1 blokkie beesvleisekstrak
- roosmaryn, na smaak
- braaivleisspeserye, na smaak
- pietersielie, na smaak
- koljanderblare, na smaak
- sout, na smaak
- tiemie, klein bietjie, na smaak
Braai uie effens met bietjie olie in swartpot, voeg nekke en klein bietjie water by met ander bestanddele. Roer en prut dan vir ongeveer drie ure (bedek).
Dien op met of sonder bydisse van jou keuse.
Nota: Ella Niemandt
Buks, jy laat my nou na my pa verlang. So het hy ook ‘n skaapnek gekook. Met heel, mediumgrootte aartappels en klein uie daarby in pot met baie water. Hy het geglo die nek moet toe onder water wees en dan stadig afgekook tot net ‘n sousie oorbly om oor rys te gooi.
Resep en foto: Buks Barnard
