PIEKEL AARTAPPELS

Resep getoets en foto’s: Susan Heyns

1 kg baba-aartappels
Piekel:
500 ml witasyn of appelasyn vir ’n ligter smaak
250 ml water
3 – 4 eetlepels suiker
2 eetlepels sout
3 – 4 knoffeltoontjies, gekap
1 – 2 teelepels swartpeperkorrels
1 teelepel mosterdsaad
1 – 2 lourierblare
’n paar rooipepervlokkies of vars kruie soos tiemie of roosmaryn, opsioneel
Was die baba-aartappels goed af onder water.
Jy kan dit heel laat of in die helfte sny, as dit bietjie groter is.
Plaas die aartappels in ’n kastrol met water en ’n bietjie sout en kook vir ongeveer 8 – 10 minute totdat dit net sag is, maar nie pap nie.
Dreineer en laat effens afkoel.
Maak intussen die piekel – meng die asyn, water, suiker en sout in ’n kastrol.
Voeg die knoffel, peperkorrels, mosterdsaad en lourierblare by.
Verhit tot kookpunt en laat vir 2 – 3 minute prut totdat die suiker en sout opgelos is.
Plaas die warm aartappels in skoon gesteriliseerde glasbottels of houers.
Giet die warm piekel oor die aartappels totdat dit heeltemal bedek is en seël die bottels met die deksels.
Laat dit afkoel tot kamertemperatuur en plaas die bottels in die yskas.
Laat staan vir ± 5 dae.
Bedien met die volgende sous:
MAYONNAISE SOUS
½ koppie mayonnaise
2 eetlepels jogurt of suurroom, opsioneel – maak dit ligter
1 klein rooi ui, fyngekap of ½ koppie gepiekelde rooi ui, nog lekkerder
1 – 2 eetlepels vars pietersielie of dille, gekap
1 eetlepel mosterd, Dijon of gewone mosterd
sout en peper na smaak
gekookte eiers of spek stukkies vir ekstra vulsel, opsioneel
Dreineer 500 g van die gepiekelde baba-aartappels effens, sodat dit nie te nat is nie en sny dit in skywe.
Meng die mayonnaise, jogurt / suurroom (indien gebruik), mosterd, sout en peper in ’n bak.
Voeg die aartappels, rooi ui en vars kruie by en meng liggies deur sodat die aartappels nie breek nie.
Plaas die slaai in die yskas vir minstens 30 minute sodat die geure kan trou.
Bedien koud saam met braaivleis, vis of hoender.

Nota: Foto 2
Ek het nog 2 verskillende soorte gemaak. Ek het 1 eetlepel medium kerriepoeier en borrie bygevoeg by die een. Die ander het ek 200 ml soja-sous met roosmaryn takkies bygevoeg. Die baba-aartappels lyk mooier as die klein gesnyde aartappels.