WORTEL-ROLKOEK

Resep getoets en foto: Ilze Jacobs
Dis regtig baie, baie lekker. Die hoeveelheid meel is perfek.

Beslag:
95 g koekmeel
½ teelepel koeksoda
½ teelepel bakpoeier
½ teelepel kaneel
½ teelepel gemmer
¼ teelepel neutmuskaat
¼ teelepel sout
3 groot eiers
100 g witsuiker
65 g bruinsuiker
2 teelepels vanilla geursel
2 koppies gerasperde wortels
½ koppie gekapte okkerneute vir garnering, opsioneel
Vulsel:
125 g botter of margarien
1 koppie versiersuiker
1 teelepel vanilla geursel
225 g saggemaakte roomkaas (nie maaskaas nie)
Meng die meel, koeksoda, bakpoeier, speserye en sout saam.
In ‘n aparte bak, klits die eiers en 2 suikers vir 3 – 4 minute tot lig en roer die vanilla by die mengsel in.
Voeg die droë bestanddele by die eiermengsel en vou saam met die wortels deur (moenie te woes meng sodat die lug uit die mengsel ontsnap nie).
Voer ‘n rolkoekpan uit met bakpapier en spuit of smeer met olie.
Skep die beslag in die pan en versprei eweredig.
Bak in ‘n voorverhitte oond by 180ºC vir 12 – 14 minute.
Haal die koek uit die oond, sprinkel versiersuiker bo-oor en keer uit op ‘n klam vadoek.
Trek die bakpapier versigtig af en rol die koek, terwyl dit nog warm is, vanaf die kort kant styf op.
Laat staan die koek so opgerol tot heeltemal afgekoel.
Maak intussen die vulsel aan.
Klits die botter en suiker saam in ‘n mengbak.
Voeg die vanilla en roomkaas by en klits tot glad.
Rol die afkoelde koek versigtig oop en smeer ongeveer 2/3 van die vulsel oor die oopgerolde koek.
Rol die koek weer versigtig op met die vulsel en plaas dit op ‘n bord.
Smeer die oorblywende versiersel bo-op die gerolde koek.
Sprinkel met neute, indien verkies en verkoel vir ten minste ‘n uur voordat dit bedien word.