VRUGTEKOEK MET LEMOEN- EN BRANDEWYNSTROOP

Kook die volgende saam vir 10 – 15 min:
500 g vrugtekoekmengsel
1 koppie bruinsuiker
1 koppie water
250 g botter of margerien
1 teelepel koeksoda
Voeg na 15 min by indien gebruik word:
kersies of dadels, opsioneel
Laat baie goed afkoel en meng by:
3 eiers, geklits
½ koppie brandewyn
2 eetlepels goue stroop
Sif die volgende saam:
2 koppies koekmeel
1 teelepel gemengde speserye
1 teelepel fyn kaneel
Ekstra:
2 teelepels bakpoeier
kersies vir bo-op

Volg die stappe soos bo tot waar die gouestroop, eiers en brandewyn bykom.
Meng die gesifte meelmengsel by.
Voeg die bakpoeier by en meng alles goed deur.
Skep in voorbereide koekpan.
Indien jy kersies bo-op wil gebruik, is dit nou die tyd om hulle bo-op die koek te plaas.
Bak vir 1 uur teen 120°C.

Nota:
My oond is baie warm so pas maar aan volgens jou oond.
Toets vir gaarheid voordat jy dit uit die oond haal.

Sous:
½ koppie suiker
1 koppie lemoensap
¼ koppie brandewyn

Kook alles saam tot suiker opgelos is.
Wanneer die koek uit die oond kom, laat staan paar minute, keer die koek uit die pan en smeer die sous met ‘n kwassie reg rondom en onder. Laat die koek heeltemal afkoel, maak toe met foelie en herhaal die stroop proses 1 keer elke week vir 4 weke.

Resep en foto: Renette Jacobson