RONEL SE GESONDHEIDSBESKUIT
Ek het vanoggend hierdie beskuit gebak en dit is nou in die oond om te droog. Ek hou van die resep want mens kan regtig bysit en insit wat jy het. Ek het die karringmelk vervang met vrugte jogurt en ek het hawermout en corn flakes vervang met 3 koppies “fruit and nut” muesli wat klaar rosyne ingehad het. Ek het nie nog ekstra ingesit nie, maar net gekyk dat my mengsel mooi bymekaar kom en nie te droog is nie. Ek het ook xylitol gebruik in die plek van die suiker. Dit ruik ongelooflik lekker.
- Meng droë bestanddele saam:
- 1 ½ koppie hawermout
- 2 koppies Nutty Wheat
- 2 koppies koekmeel
- 2 handevol Corn flakes, maak effens fyner
- 2 handevol All bran flakes, maak effens fyner
- 2 teelepels bakpoeier
- 1 handvol klapper, opsioneel
- 1 handvol sade, opsioneel, ek het sonneblom sade gebruik
- 1 handvol rosyne
- Klits saam:
- 3 eiers
- 1 koppie suiker
- 1 ½ koppie karringmelk
- 1 teelepel koeksoda
- 1 teelepel sout
- Ekstra:
- 250 g margarien
Smelt die margarien.
Voeg die geklitste eiermengsel en sagte margarien by die droë bestanddele.
Meng deeglik deur.
Nota:
Ek het mengsel dubbeld aangemaak en gevind dit was baie slap.
Toe voeg ek omtrent ‘n koppie bruismeel by om dit net stywer te maak.
Plaas die mengsel in ‘n voorbereide vlak bakplaat en druk vas. Maak gelyk bo-op
Bak teen 180° vir 25 – 30 minute.
Haal uit die oond en laat effens afkoel.
Sny verlangde grootes en droog uit.
Resep: Ronel Rudolph
Nota en foto: Rina Kleinhans
