RETHA SE BOONTJIESOP

Resep geplaas deur Retha Collett
Foto:  Retha Collett
My man maak vreeslike fancy kos en het vandag vir die 2de keer gevra of die resep neergeskryf het. Dit gebeur nie sommer nie 😂

• 500 g suikerboontjies
• 6 wortels
• 1 groot patat (ek gebruik oranje patats)
• 3 seldery stingels
• 2 preie (leeks)
• 2 uie
• 20 ml botter
• 1 pakkie Knorr soppoeier (Lamb and Veggie)
• 1 skaapskenkel (lamb shank – die hele een)
• 250 g spek
• 1 groot blik tamatiepuree
• Worcestershire sous
• sout en swart peper na smaak
• Week die boontjies in water terwyl jy besig is met voorbereiding van die res van die groente.
• Kap seldery, preie en uie, plaas in drukkoker saam met botter en spek. Laat dit solank bietjie karameliseer saam met die skaapskenkel.
• Dreineer boontjies se water af, spoel af in nog water en voeg die boontjies by die drukkokermengsel.
• Voeg kookwater by tot die drukkoker half is en die groente bedek is plus nog 5 cm water (ek het ‘n klein drukkoker, dis so ongeveer 1,2 liter water). Seël en laat stoom opbou en kook vir ongeveer 90 min (of langer – solank daar voldoende stoom uitkom en dit nie brand nie).
• Skil wortels en patat en rasper fyn (voedselverwerker).
• Na 90 minute, skakel drukkoker af en laat stoom afloop. Skep die mengsel in ‘n groot soppot saam met die wortels, patats, tamatiepuree.
• Kook vir 30 minute. Voeg sout en Worcestershire sous by na smaak.
• Haal die skenkel uit en sny enige vleis wat nog mag vassit af en sit terug in die sop. Maak soppoeier aan met bietjie koue water en voeg by.
• Sout en swartpeper na smaak.
• Bedien warm met varsgebakte brood.