ONTBEENDE HOENDER MET ASPERSIE PUREE EN KAPOKAARTAPPELS (5)

ONTBEENDE HOENDER MET ASPERSIE PUREE EN KAPOKAARTAPPELS

Ontbeende hoender met spek en bosbessies:
ontbeende hoender
geelsout – Aromat
suurlemoenpeper
spek
gedroogte bosbessies

Ontbeen die hoender deur die vlerke en boudjies eerste uit te haal. Sny die borsbeenversigtig los sonder om die vel raak te sny en vlek oop. Versprei die vleis egalig deur die borsie se vleis gedeelte middel deur te sny en in die middel te plaas. Sprinkel mildelik met geel sout en suurlemoen peper. Pak die hoender eweredig met spek en strooi gedroogde bosbessie oor. Rol die hoender in die lengte en vou die punte na binne. Draai stewig toe met foelie.
Bak vir ongeveer 90 minute in ‘n matige oond. Maak een punt van die foelie oop en verwyder die sous. Hou warm tot bedien word, sny in skywe vir bediening.

Aspersie Puree:
1 pak vars aspersies
sout en peper na smaak

Sny die punte van ‘n pak aspersies af. Verhit water met sout en plaas die aspersie punte in vir ongeveer 2 minute. Haal uit en sit dadelik in yswater. Sny aspersie punte kleiner en blits met ‘n voedselverwerker tot glad. ‘n Klein bietjie yswater kan bygevoeg word om die regte tekstuur te kry. Geur met sout en swart peper.

Kapokaartappels:
aartappels, hoeveelheid na gelang van porsies
botter
sout en peper

Sny aartappels in skywe en kook tot goed gaar in soutwater. Voeg by ‘n groot homp botter, sout en swart peper. Meng goed deur.

Opdiening:

Spuit ‘n roset van aartappels op die bord, plaas die hoender wat in skywe gesny is daarop. Plaas ‘n groot lepel van die Aspersie puree langs die kant. Verdun van die puree met olyf olie en plaas oor hoender. Garneer met bosbessies.
Nota:

Ek maak die ontbeende hoender gereeld, maar dis die eerste keer wat ek die bosbessies insit. Het al in die verlede gedoogte appelkose saam met die spek gebruik. Ek laat die hoender goed afkoel en vries dit dan. Wanneer ek dit wil gebruik, haal ek dit net uit die vrieskas, laat ‘n rukkie ontdooi en sny in skywe. Daar kom ongeveer 20 skywe uit ‘n hoender.

Resep en foto: Erna Hattingh