ONGEBAKTE DADELBALLETJIES

Lekker maklik en vinnig om te maak. Handig vir ‘n kosblik skool toe of as daar dalk ‘n matrikulant in die huis is.

Die resep is een van daardie wat nog in my peetma (Lenie du Plessis) se handskrif in my niggie se boek is. Ek het dit na meer moderne mates en gewigte “vertaal”.

1 ½ pakkie Marie beskuitjies
500 g dadels
250 g botter
2 eiers
½ koppie suiker
1 koppie water

Kook dadels, suiker en water tot sag.
Smelt botter en voeg by.
Klits eiers goed en voeg by warm dadelmengsel terwyl mens heeltyd meng. Meng goed.
Kap Marie beskuitjies fyn en voeg by, meng deur.
Laat staan ‘n rukkie in die yskas om styf te word.
Rol opgehoopte teelepels vol in balletjies.
Rol die balletjies in klapper.
Pak in klein “cupcake” houertjies en verpak.

Resep en foto: Tosca De Villiers