MILKYBAR KAASKOEK
- Kors:
- 1 pak Tennisbeskuitjies
- 2 eetlepels margarien (of soos verkies)
- Vulsel:
- 240 g Milky bar
- 2 houers maaskaas/roomkaas (volroom is lekkerder)
- 1 blik kondensmelk
- 250 ml room
- 100 ml suurlemoensap
- 5 velle gelatien (1 eetlepel hoogvol)
- Bolaag:
- 1 boksie rooi kersies
- 1 pak kersie jelliepoeier
- 1 koppie kookwater
- 100 ml kouewater
- 2 eetlepels aarbei konfyt, opsioneel
Druk die koekies fyn en meng met gesmelte margarien. Druk in “springform pan” vas as kors.
Plaas die pan met die mengsel in die yskas om te stol. Sit die gelatienvelle in koue water.
In ‘n dubbele koker, voeg die room en milkybar bymekaar. Smelt dit stadig oor kokende water. Haal die bak af sodra die sjokolade gesmelt is.
Druk die water uit die gelatien en voeg by die warm sjokolademengsel, meng totdat die gelatienvelle opgelos is. Laat dit afkoel terwyl die res van die tert gemaak word.
Maak volgende vir die bolaag:
Meng die jelliepoeier in die kookwater totdat dit opgelos is en voeg hele boksie kersies by, asook die konfyt. Voeg die kouewater by, meng deur en laat die mengsel afkoel.
Voeg die roomkaas, kondensmelk en suurlemoensap by en meng goed.
Voeg die sjokolademengsel stadig by die roomkaasmengsel en meng goed deur.
Giet die mengsel in die pan met die voorbereide kors (deur ‘n sif indien daar klonte is).
Laat afkoel in yskas vir 20 min.
Giet die kersie jelliemengsel stadig bo-op oor die agterkant van ‘n lepel sodat dit nie meng met die vulsel nie.
Laat staan in yskas vir 3 ure of oornag sodat dit kan stol.
Resep en foto: Suenell Liebenberg
