MEKSIKAANSE BEESSKENKELGEREG

750 g beesskenkels, opgesny
1 ui, gekap
1 knoffelhuisie, gekap
1 rissie, gekap
6 wonderpeperkorrels
3 naeltjies
1 lourierblaar
sout en varsgemaalde swartpeper, na smaak
7½ ml fyn komyn
7½ ml fyn koljander
2½ ml rooipeper
2½ ml gerookte paprika
1 blik tamatie-, uie- en rissiemengsel
1 blik rooi nierboontjies
30 rosa tamaties (klein tamaties)
100 ml port
200 ml pasta penne, aldente (gekook vir 8 minute, gedreineer en geplaas in yswater tot gebruik)

Pak die opgesnyde uie in ‘n oond-veilige pot met deksel saam met die wonderpeper, naeltjies en lourierblaar. Pak die skenkelstukke bo-op en geur met sout, peper, komyn, koljander en rooipeper.
Strooi die rissie en knoffel oor en versprei die tamatiemengsel bo-oor saam met die port.
Plaas die deksel op en bak in die oond, vooraf verhit tot 180 °C, vir een uur.
Voeg die rosa tamaties by, roer deur en verlaag die hitte na 160 °C, bedek en bak vir ‘n verdere twee uur.
Voeg die boontjies en pasta by, bedek en bak vir nog 30 minute.
Bedien op koring of rys.

Resep en foto: Johan Rossouw