LIEN SE KARRINGMELKBESKUIT
Ek plaas weer op versoek my karringmelkbeskuit resep soos my resep en soos ek dit bak. Die paar stukkies beskuit op die bordjie, is my gedroogde beskuit.
- 3 kg bruismeel
- 4 koppies suiker (jy kan bruinsuiker ook gebruik of die suiker verminder)
- 1 eetlepel sout
- 1 kg margarien
- 1 liter karringmelk (of Amasi werk net so goed)
- 7 eiers ( ipv 6, die ekstra een werk beter)
- 1 eetlepel anyssaadjies (dit kan jy self bepaal indien verkies)
Smelt die margarien oor lae hitte.
Voeg die karringmelk/amasi by en klits goed.
Voeg die geklitste eiers by en meng goed.
Meng die droë bestanddele saam in ‘n knie skottel.
Voeg die margarienmengsel by die droë bestanddele, meng en knie goed deur.
Maak bolletjies en pak in voorbereide panne. (nota onder aan)
Bak dit vir 1 uur by 180°C.
Hier is my éié persoonlike wenke.
Ek gebruik gewone gróót broodpanne en pak 13 x 3 rye bolletjies.
Ek weeg elke bolletjie en dit moet dus tussen 40 en 42 g elk weeg. Dit maak die breek van die gaar beskuit makliker
Ek rol nie die bolletjies te styf nie, vandaar die vlokkerige voorkoms.
Ek maak die volgepakte beskuitpanne toe met ‘n klam vadoek, dit verhoed uitdroging.
Ek laat nie die beskuit vooraf rys nie, dit rys maar so in die panne terwyl ek weeg en rol.
Die beskuit moet heeltemal afgekoel wees voordat dit gebreek kan word en op die oond se rakke gepak word.
Droog by 70°C vir 4 ure in die oond, waarvan die deur nie heeltemal toe is nie.
Ek hoop almal verstaan nou beter.
Lekker bak en lekker eet.
Resep en foto: Lien Bruwer
