LEMOENKOEK MET STROOP

My Ma is vreeslik lief vir lemoenkoek en ek het ‘n spesifieke resep wat ek altyd bak. So ruk terug het ek hierdie resep raak geloop, wat ek effens aangepas het. Moet sê ek sal nooit weer ‘n ander een bak nie! Ek deel dit graag met julle.

Beslag:
375 ml koekmeel
7.5 ml bakpoeier
knippie sout
4 groot eiers
45 ml margarien
185 ml melk
10 ml lemoenskil
250 ml suiker

Verhit oond tot 180°C. Kook melk, lemoenskil en margarien saam.

Klits suiker en eiers saam tot liggeel.

Sif meel, bakpoeier en sout in eiermengsel en meng. Voeg effens afgekoelde melkmengsel by en meng liggies.

Verdeel tussen twee 18 cm koekpanne wat met bakpapier uitgevoer is en bak 35 minute tot gaar. Haal uit oond en maak nou stroop.

Stroop:
375 ml suiker
250 ml water
250 ml lemoensap
45 ml margarien

Plaas bogenoemde in ‘n kastrol op die stoof. Roer oor medium hitte tot suiker opgelos is en laat vir 5 minute kook. Prik gaatjies in koek en verdeel stroop gelyk op tussen 2 koeklae.
Sit koek net so met panne in yskas tot koud.

Haal uit panne, trek papier af en versier.

Versiersel:
500 g versiersuiker
125 g margarien
lemoensap

Klits margarien en voeg versiersuiker bietjies bietjies by om die beurt met lemoensap. Sodra regte dikte, klits tot romerig en versier koek soos verkies.

Resep en foto: Elaine Steyn