LEKKER MELKTERT
“Ek het vandag so ‘n bietjie my hand geslaan aan ‘n ou en lekker melktertresep. In Nieu-Seeland moet jy maar self bak, want jy kry dit nie te koop in die supermark nie. Die krediet vir die resep van die vulsel gaan aan my skoonmoeder, Magda Garbers.”
- Kors:
- 125 g botter of kunsbotter, by kamertemperatuur
- 125 ml suiker
- 1 eier, geklits
- 275 g (500 ml, ongesif afgemeet) koekmeel
- 10 ml bakpoeier
- knypie sout
- Vulsel:
- 1 liter melk
- 2 eetlepels botter of kunsbotter
- 5 ml vanilla geursel
- 3 eiers
- 200 ml suiker
- 2 eetlepels koekmeel
- 2 eetlepels mielieblom
- knypie sout
- kaneel vir bo-op
Voorverhit die oond tot 200 °C. Smeer ‘n 2 liter tertbak met botter of kleefwerende-sproei. Meng botter en suiker deeglik. Voeg eier by en meng. Sif koekmeel, bakpoeier en sout saam. Meng meelmengsel met die eiermengsel tot dit ‘n deeg vorm. Druk dit plat in tertbak, eweredig en dun en bak vir 10 – 12 minute tot ligbruin.
Verlaag temperatuur na 180 °C.
In ‘n kastrol, bring melk tot kookpunt en, intussen, in ‘n aparte houer, meng suiker en botter goed, voeg dan eiers by. Roer koekmeel, mielieblom en sout by. Sodra melk kookpunt bereik, haal van hitte af en meng meel- en eiermengsel by die melk met ‘n draadklitser.
Sit terug op hitte en hou aan roer totdat vulsel gaar en dikkerig is (2 – 3 minute).
Roer dan botter en vanilla geusel goed deur. Versprei die vulsel oor die tertkors.
Nou het jy ‘n keuse, jy kan dit óf bak totdat dit oppof, óf dit laat stol. Ek het dit gebak vir sowat 10 minute, tot by kamertemperatuur laat afkoel en toe in yskas geplaas.
Dit was heerlik!
Resep en foto: Japie Jacobs
