LANGKLOOF APPELWIELE
- Suurlemoenstroop:
- 625 ml water
- 500 ml witsuiker
- fyn gerasperde skil en sap van 1 suurlemoen
- Skondeegkors:
- 500 ml koekmeel
- 25 ml witsuiker
- 15 ml bakpoeier
- 1 ml sout
- 90 gram botter of margarien
- 1 groot eier
- 100 ml water
- Appelvulsel:
- 4 Granny Smith appels
- klontjies botter of margarien
- kaneelsuiker na smaak
- Ekstra:
- kaneelsuiker
Stroop
Kook die water, suiker en skil vir 5 minute lank saam.
Voeg suurlemoensap by en hou warm.
Skondeeg
Voorverhit oond tot 180°C. Sif droë bestanddele saam en frummel botter daarin.
Klits eier en water saam en sny met ‘n deegsnyer by frummels in om ‘n sagte, hanteerbare deeg te vorm – sny nog meel in as deeg te slap is, of nog water as deeg te styf is.
Rol sowat 1 cm dik in ‘n reghoek op ‘n meelbestrooide oppervlak uit.
Appelvulsel
Skil en rasper appels grof oor die uitgerolde deeg.
Rol deeg soos ‘n rolkoek op met appels tussenin. Sny die rol met ‘n skerp mes in skywe.
Giet die stroop in ‘n groot oondvaste bak.
Plaas die snye op die snykant styf teen mekaar in die stroop.
Stip met klontjies botter en strooi kaneelsuiker oor.
Bak poeding vir 40 tot 50 minute lank tot mooi goudbruin.
Sit voor met vanilla roomys.
Resep en foto: Ida Marx
