HOENDER MET TIKKA EN BLADMASALA

500 g hoenderborsstukke, in blokke gesny
200 g ui en seldery, opgesny
100 g kleinworteltjies, in juliennerepies van 2 – 4 mm lengtes gesny
200 g botterskorsie, in blokke gesny
200 g bruin sampioene, in 1 cm skywe gesny en gehalveer
2 knoffelhuise, fyn gekap
2 cm gemmer, fyn opgesny
2 rooi rissies of 1 teelepel rooipeper
400 g gekapte tamaties
30 ml olyfolie
6 wonderpeperkorrels
3 naeltjies
1 lourierblaar
kaneelstokkie
1 teelepel fyn komyn
2 teelepels borrie
2 teelepels tikka masala
1 teelepel bladmasala
1 teelepel gemaalde koljander
175 ml witwyn
25 ml Brandewyn
sout en gemaalde peper na smaak
sap van 1 suurlemoen
koljanderblare
rys met rysspeserye gegeur

Verhit die olie in ‘n pot op medium hitte. Voeg die ui- en selderymengsel by en roer deur voordat die wortels, wonderpeper, naeltjies, kaneelstokkie en lourierblaar bygevoeg word. Roerbraai vir ‘n paar minute voordat die botterskorsie bygevoeg word. Roerbraai tot halfpad gaar en voeg die knoffel, gemmer, komyn, masala, borrie, rissies en koljander by en roerbraai deur.
Voeg die hoenderstukke by en braai saam met die res tot die hoender begin verbruin. Voeg die witwyn, brandewyn en tamaties by, geur met sout en peper en roerbraai sowat 3 minute.
Bedek en plaas in ‘n voorverhitte oond teen 160 °C.
Voeg die sampioene en suurlemoensap na sowat 30 minute by, roer deur en laat prut vir ‘n verdere 30 minute.

Resep en foto: Johan Rossouw