HEEERLIKE WESKUS SWARTMOSSELGEREG
Liezl en my vrou, het onder my toesig vir ons hierdie heeeerlike Weskus swartmossel gemaak (self uitgehaal). Ons het dit saam met geroosterde brood geniet. Dit was djeeeerlik. Ons het die vloeistofbestanddele gehalveer, want ons het nie so baie mossels gehad nie.
- 2 eetlepels botter
- 1 ui, gekap
- 4 knoffelhuisies, gekap
- 2 rooi rissies, ontpit en gekap (ons het 3 gebruik)
- 1 koppie witwyn
- 500 ml room
- 2 teelepels Aromat
- 1 kg mossels
- 1 suurlemoen se gerasperde skil
- sprietuie, gekap
Verhit botter in pan en braai gekapte ui, gekapte knoffelhuisies en gekapte rooi rissies daarin vir 3 – 5 minute.
Voeg witwyn by en laat prut vir vyf minute.
Plaas room en Aromat by mengsel en laat stadig kook op lae hitte vir nog vyf minute.
Voeg mossels by asook suurlemoenskil bo-oor. Plaas ‘n deksel op en kook stadig vir 8 – 10 minute.
Haal mossels uit en plaas in ‘n bak en skep die sous oor die mossels.
Garneer met gekapte sprietuie.
Foto: Gideon Louw
