GEVULDE PANNEKOEKE MET MAALVLEIS
- Pannekoek:
- 2 teelepels sout
- 2 liter water
- 4 eiers
- 4 koppies koekmeel
- 4 teelepels bakpoeier
- ¾ koppie olie
Klits alles saam tot glad. Laat rus ‘n ½ uur in die yskas en bak dan die pannekoeke. Mengsel lewer sowat 60 pannekoeke, maar jy benodig net 10 – 12… ek vries die res net so op mekaar in hopies van 10.
- Maalvleis:
- 1 kg maalvleis
- 1 groot ui, gekap
- 1 eetlepel Worschestershire sous
- 1 groente “stock” blokkie
- 1 bees “stock” blokkie
- 2 ml fyn naeltjies
- 2 ml fyn swart peper
- ½ teelepel Aromat
- 2 eetlepels Smash
- 1 eetlepel Bisto poeier
Braai ui liggies in bietjie olie. Voeg al die maalvleis op een slag by en roer tot alles los en half gaar is. Die vleis gaan sy eie vog maak, moenie op die stadium water byvoeg nie. Voeg nou al die geurmiddels by en roer deeglik deur. Laat so 5 min op lae hitte deurkook. Voeg die Smash en Bisto by en roer deur die vleis. Nou kan jy bietjie kookwater byvoeg om ‘n sagte, maar nie ‘n pap, mengsel te kry.
Skep die mengsel op elke pannekoek, gebruik ongeveer 10 tot 12 pannekoeke, smeer so bietjie plat, rol op en pak styf langs mekaar in ‘n glasbak.
Maak ‘n dun witsous en giet bo-oor.
- Witsous::
- 6 eetlepels margarien
- ¼ koppie koekmeel
- sout en peper na smaak
- 3 koppies melk
- ekstra gerasperde kaas vir bo-oor
Smelt botter in ‘n kastrol. Haal af van die hitte. Roer koekmeel met draadklitser by tot glad.
Plaas terug op medium hitte. Voeg melk by terwyl jy vinnig roer met draadklitser tot sous verdik. Laat 2 minute deurkook tot verdik.
Skep die witsous oor die gevulde pannekoeke.
Rasper kaas oor die pannekoeke en laat net-net smelt in die oond op 180ºC.
Bedien met slaai.
Bon Apetit.
Resep en foto: Anna Venter
