GESTOLDE MALVAPOEDING

10 ml gelatine
45 ml sterk swart koffie
125 ml warm water
20 malvalekkers
120 g baksjokolade
250 ml YSKOUE Ideal melk
125 ml geklopte room
12 Boudoir vingers

Week gelatine in koffie in ‘n dubbel kastrol.
Voeg warm water, malvalekkers en sjokolade by.
Laat stoom tot alles gesmelt is en glad is. Sit in ‘n koel plek tot dit net net wil stol.
Klits koue Ideal melk tot verdubbel in volume.
Voeg sjokolade mengsel stadig by. Vou room in met ‘n lepel.
Skep in gesmeerde ring vorm en plaas in yskas om te stol.
Keer uit op ‘n bord net voor bediening.
Pak halwe Boudoir vingers rondom en vul die holte met vanilla roomys.

Resep en foto: Marlize Williams