GEMMERBROOD MANNETJIES EN VROUTJIES

Sowat 50 klein mannetjies met ‘n uitdrukker van 5 x 5 cm.

125 g (135 ml) botter
100 g (125 ml) bruinsuiker
1 eiergeel
350 g (625 ml) koekmeel
5 ml koeksoda
15 ml fyn gemmer
40 ml gouestroop

Verhit oond tot 180 ºC. Voer ’n bakplaat met bakpapier uit. Room botter en bruinsuiker met elektriese menger tot lig en romerig. Voeg eiergeel by en klits goed.
Sif koekmeel, koeksoda en gemmer saam. Voeg droë bestanddele en stroop geleidelik by bottermengsel.
Meng goed ná elke byvoeging. Knie mengsel goed op werksoppervlak.
Rol deeg uit tussen twee lae waspapier tot ongeveer 3 mm dik. Druk uit met ’n mannetjie-uitdrukker.
Plaas koekies op die uitgevoerde bakplaat en bak vir 10 minute. Laat afkoel.