EENPAN HOENDERKERRIE EN RYS
Ek het hierdie resep vir ‘n eenpan hoenderkerrie-en-rys seker vier jaar gelede ontdek en in my eie kookboek ingeplak… en dit het my drie-en-‘n-half jaar geneem om dit te maak! Nou wens ek dat ek het dit al jare gelede begin maak het, want dis heerlik, en min moeite… perfek vir ‘n reënerige aand! En kindervriendelik, want dit brand nie – bonus.
- 5 – 6 hoenderdye
- 15 ml olie
- 1 ui, gekap
- 3 knoffelhuisies, gekap
- 10 cm gemmer, gerasper
- 30 ml kerriepoeier
- 1 stuk pypkaneel
- 250 ml rou rys
- 650 ml hoenderaftreksel
- 30 ml witasyn
- 125 ml blatjang
- sout en peper na smaak
Braai hoender in olie tot bruin in plaat-en-oond pot en skep uit.
Braai ui, knoffel en gemmer in dieselfde olie vir 2 – 3 minute.
Voeg rys en kaneel by en braai nog drie minute.
Voeg res van die bestanddele by, pak hoender bo-op rys en bring tot kookpunt op stoof.
Bak bedek 1 – 1½ uur by 160 °C tot rys gaar is.
Bak laaste 10 minute oop totdat hoendervel bros raak.
Bedien met tamatie-en-uie en/of piesangslaai.
Resep en foto: Ilze Garbers Jacobs
