DONKERSJOKOLADE GEBAKTE KAASKOEK
“Donkersjokolade gebakte kaaskoek (vir die ‘bitter palet’) a’la Carmari. My roomkaas was tuisgemaak. Vir dikroom skep ek room van vars melk wat ons self kook en afkoel. Na so drie keer se skep en paar dae in yskas, is dit perfekte tekstuur. Het gemaak vir klompie “expats”, want een van ons vriendinne het verjaar, maar hou net van bitter donkersjokolade. Tussen die spul Kanadese, Britte, Iere en Amerikaners was die reaksie: “Wow! Oh my word! This is amazing”…veilig om te sê: ‘n wenner. Beste kaaskoek beslag wat ek nog gemaak het. Heerlik dik en romerig.”
- 24 Oreos (myne was 17 Oreos en res “digestive biscuits”), fyn gemaak
- 3 eetlepels botter, gesmelt
- 200 g donkersjokolade (ek het 160 g gehad en res met donker baksjokolade aangevul)
- 900 g roomkaas
- ½ koppie versiersuiker, opgehoop
- 3 eetlepels kakaopoeier, opgehoop
- ⅓ – ½ koppie dikroom
- 4 eiers
- tinfoelie, vir bak proses
- ekstra kakaopoeier, vir bedekking
Maak koekies fyn, meng met botter en druk vas in ronde pan se bodem (sit in yskas terwyl beslag aanmaak).
Smelt sjokolade en laat effe afkoel, maar steeds vloeibaar.
Klits roomkaas tot effe sagter, sif versiersuiker en kakao by en klits nog verder. Voeg room by en klits goed.
Klits eiers een-vir-een by. Klits effens afgekoelde, maar lopende, sjokolade by.
Skep vulsel op kors.
Sit bakpan in 2 – 3 lae tinfoelie en in oondpan met water.
Bak 50 minute by ± 160 °C en dan nog sowat 10 – 15 minute by nog laer temeratuur, sowat 150 °C of laer. Skakel oond af, maar los in oond. Maak oond na sowat 10 minute op skrefie oop, dan na rukkie heeltemal oop, haal gebak uit om buite verder af te koel en sit oornag in yskas.
Ons het net ekstra kakaopoeier gesif, bo-oor gestrooi voor opgedien het, maar ander mense hou van lagie ganache oor.
Resep en fotos: Carmari Fourie Strobos
