BROODDEEG VIR ROLLETJIES MET VARIASIES
Resep, idees en fotos: Kashiefa Sulaiman Abrahams
- 1 teelepel suiker
- ½ teelepel sout
- 1 pakkie kitsgis
- 2 koppies koekmeel
- 2 koppies bruismeel
- 600 ml melk
- 100 g botter of margarien
- 100 ml kookolie
- Plaas die suiker, sout en gis in ‘n diep mengbak en meng dit saam.
- Voeg die koekmeel en bruismeel by en meng deur.
- Verhit die melk en botter of margarien tot louwarm, die vingers moet nie brand nie.
- Voeg die kookolie by die melkmengsel en roer deur.
- Meng die nat bestanddele stadig by die droë bestanddele en knie goed deur.
- Bedek die deeg in die mengbak en laat dit rus vir ongeveer 1 uur.
- Vorm bolletjies so groot na eie keuse, pak dit in ‘n voorbereide oondbak.
- Bak in ‘n voorverhitte oond by 180ºC vir ongeveer 15 tot 20 minute of tot goudbruin.
- Soutbroodrolletjies:
- Ek maak dit in happiegrootte vorms.
- Gebruik dieselfde brooddeegresep, breek stukkies deeg af en vorm in balletjies, plaas dit langs mekaar op ‘n voorbereide bakplaat.
- Maak ‘n mengsel van robot soetrissies, gesnyde uie en knippie gemengde kruie.
- Smeer geklitste eier bo-op die deegballetjies en sprinkel die soetrissiemengsel oor die balletjies.
- Bak die deegballetjies in ‘n voorverhitte oond by 180ºC vir 15 tot 20 minute.
- Haal uit die oond en smeer dadelik soetrissiesous bo-oor die rolletjies.
- Platbroodjies:
- Gebruik dieselfde brooddeegresep, breek groter balletjies af en druk dit plat op ‘n oppervlak, smeer die hande met meel, sodat dit makliker kan hanteer.
- Ek maak dit gewoonlik die grootte van ‘n piering.
- Prik die bokant van die deeg met ‘n vurk en smeer liggies met ‘n geklitste eier.
- Plaas die sirkels op ‘n voorbereide bakplaat en bak in ‘n voorverhitte oond by 180ºC vir 7 minute.
- Smeer dit met ‘n knoffel- en kruiesmeersel.
- Knoffel- en kruiesmeersel
- 100 g botter
- 1 teelepel knoffelpoeier
- ½ teelepel vars knoffel, fyn gedruk
- ½ teelepel gemengde kruie
- bietjie sout na smaak
- Meng die bestanddele goed en smeer oor die warm platbrode.
- Hoendervulsel vir broodrolletjies:
- 3 hoenderborsies, gaar gestoom en fyn gekap
- 1 ui, fyn gekap
- 3 teelepels braaivleisspeserye
- ½ teelepel droë rissiepoeier
- paar vars koljanderblare, fyn gekap
- Meng die bestanddele goed.
- Wanneer die brooddeeg klaar gerys het, breek stukkies deeg af en maak dit plat in die handpalm.
- Plaas 1 teelepel van die hoendermengsel in die deeg en vou die deeg om die vulsel in ‘n balletjie.
- Pak die gevulde balletjies in ‘n oondbak, smeer die balletjies met ‘n geklitste eier en strooi saadjies oor.
- Ek kry ongeveer 30 balletjies uit die resep.
- Bak die balletjies in ‘n voorverhitte oond van 180ºC vir ongeveer 15 tot 20 minute tot goudbruin bo op.
