BRASILIAANSE KLAPPERHOENDER
Ek het hierdie resep gemaak met ‘n klaar gaar hoender, en net die hoender heel laaste in die sous bygesit en laat deur kook. Ek het die twee borsies in die lengte deur gesny dat hulle dunner is en dat die sous lekker kan intrek.
Ek het dit die aand voor die tyd voorberei en dit deur die nag in die yskas gehou sodat die smake lekker in die gaar hoender kan intrek. Ons het dit regtig baie geniet en ek sal dit beslis weer maak.
- 6 – 8 beenlose, vellose hoenderborsies of gemengde hoenderporsies
- sout en peper, na smaak
- 2 eetlepels olyfolie
- 1 ui, fyngekap
- 3 knoffelhuisies, fyn gekap
- 1 eetlepel gerasperde vars gemmer
- 1 bakkie sampioene, in kwarte gesny
- 1 groen soetrissie, dun gesny in repe
- 4 stukkie songedroogte tamaties, lang repe gesny (of na smaak)
- 1 teelepel fyn komyn
- 1 teelepel fyn koljander
- 1 teelepel paprika
- ½ teelepel rooipeper (pas by smaak aan)
- 1 blik klappermelk
- 2 eetlepels tamatiepasta
- 2 eetlepels Maizena om mee te verdik indien nodig
- vars koriander of pietersielie, gekap, vir garnering
- gekookte rys vir opdiening
Geur die hoenderstukke met sout en peper.
Verhit olyfolie in ‘n groot pan of pan oor matige hitte. Voeg die gekapte ui by en soteer tot sag, ongeveer 3-4 minute.
Voeg gekapte knoffel en gerasperde gemmer by, kook nog 1 – 2 minute tot geurig.
Roer die gesnyde soetrissies, gedroogte tamaties en sampioene by en kook vir 3 – 4 minute totdat dit begin sag word.
Voeg fyn komyn, fyn koljander, paprika en rooipeper by. Roer goed om die groente te bedek.
Druk die groente na die kante van die pan en plaas die hoenderstukke in die middel. Kook vir ongeveer 5 – 6 minute totdat hoender bruin en gaar is.
Roer klappermelk en tamatiepasta by. Laat prut en kook vir 5 – 7 minute, roer af en toe totdat die sous effens verdik.
Proe en pas geurmiddels aan met sout en peper indien nodig.
Indien die sous te dun is na smaak, kan dit met bietjie maizena verdik word, kook net weer deur sodat maizena kan gaar word.
Sit warm voor oor gekookte rys, versier met vars koriander of pietersielie en paar druppels lemmetjiesap indien verkies.
Resep aangepas en getoets deur Rina Kleinhans
Foto: Rina Kleinhans
