ASPERSIETERT
Hierdie aspersietert is ‘n groot gunsteling in ons huis. Dit is lekker vinnig om te maak en saam met ‘n mengelslaai is dit sommer ‘n ligte ete.
- 1 pak (200 g) spek, in blokkies gesny
- 1 groot ui, fyngekap
- 1 blik (430 g) aspersiestukkies
- 910 ml (3½ koppies) melk
- 250 g botter of margarien
- 250 ml koekmeel
- 250 ml gerasperde Cheddar kaas
- 3 eetlepel pietersielie, fyngekap
- 10 ml mosterdpoeier
- 2,5 ml sout
- knippie rooipeper
- 4 groot eiers, geskei
Voorverhit oond tot 180 °C en spuit oondpan van 27 cm x 36 cm met kleefwerende sproei. Braai spek en uie tot gaar, skep uit en hou eenkant. Sny blik aspersies oop en voeg aspersievloeistof en melk in maatbeker tot dit 1 liter bereik.
Smelt botter in pan, verwyder van hitte en roer meel by.
Roer met draadklitser tot mengsel glad is.
Voeg melk- en aspersievloeistof by en verhit terwyl jy dit roer.
Kook tot witsous gaar en dik is. Verwyder van hitte en laat effe afkoel.
Voeg spekmengsel, aspersies, kaas, pietersielie, mosterd, sout en rooipeper by witsous. Skei die eiers. Klits die gele en voeg by die beslag in en meng goed.
Klits eierwitte tot styf en vou by beslag in.
Skep beslag in ‘n voorbereide oondbak en bak vir 35 tot 40 minute tot goudbruin en gaar.
Laat effe afkoel en sit voor.
Resep en foto : Elsa Van Kradenburg Fourie
