APPELVULSEL VIR TERTE OF PANNEKOEK

4 Granny Smith appels, geskil, stronk verwyder en in wiggies gesny (of gebruik 385 g blik tertappels)
100 g suiker
100 g gemengde korente, rosyntjies en lemoenskil (vrugtekoekmengsel)
5 ml fyn kaneel
3 ml fyn naeltjies
15 ml gemmerstroop
30 ml suurlemoensap
100 ml kookwater met Earl Grey teesakkie, maak medium sterkte tee (rooibos of heuningbos sal ook werk)

Sit alles in kastrol bring tot kookpunt en prut tot die appels sag en die droëvrugte uitgeswel is. As daar nog vloeistof is, kook tot dit feitlik droog is of behou dit indien verkies.

Maak bietjie mielieblom aan in 100 ml water en roer deur terwyl dit prut tot die vloeistof verdik en deurskynend en gaar is. Dan is daar lekker sousie by die appels.

Resep en foto: Elsabie Templeton