APPELKOOSKERRIE VAN VARKVLEISBLOKKIES

15 ml olie
1 kg varkvleisblokkies
1 groot ui, opgesny in dik skywe
1 knoffelhuisie, fyngedruk
25 ml matige kerriepoeier
3 groot tamaties, ontvel en gekap
250 ml appelkoossap
50 ml suurlemoensap
50 ml blatjang
20 ml suiker
1 appel ontkern, geskil en in blokkies gesny
sout en peper na smaak
Opsioneel: mielieblom om te verdik

Verhit die olie in ‘n groot pan en roerbraai die varkvleisblokkies daarin tot ligbruin.
Voeg die uie en knoffel by en braai oor lae hitte totdat die uie begin sag word.
Voeg die kerriepoeier by en braai nog ‘n minuut lank.
Voeg die tamaties, appelkoos- en suurlemoensap, blatjang en suiker by.
Sit ook die appel by. Geur met sout en peper.
Prut vir ongeveer ‘n uur tot vleis sag is.
As die sous te dun is verdik met ‘n klein bietjie mielieblom en kook deur tot dit verdik.
Bedien saam met rys.

Resep en Foto: Amanda Austen