ANNA SE SITRUS MARMALADE

Ek het snipper marmelade gekook… dit het perfek uitgekom.

5 groot pomelo’s
4 medium lemoene
witsuiker
1 eetlepel suurlemoensap

Sny pomelo’s en lemoene in dun skyfies met skil en al.
Bedek die vrugte met koue water en laat oornag staan.
Dreineer die volgende oggend en voeg weer koue water by. Genoeg sodat die vrugte nét -nét dryf.
Kook nou tot skilletjies sag is (‘n vuurhoutjie moet maklik deur die skilletjie glip).
Sodra sag meet die vrugte met stroop en al af. Plaas in die pot waarin jy gaan konfyt kook.
Voeg vir elke koppie vrugte, 1 koppie suiker by. Roer deur en kook stadig tot suiker heeltemal opgelos is.
Kook die konfyt nou redelik vinnig tot dit ‘n sagte jel vorm… so ±30 minute, wanneer jy op ‘n yskoue piering toets.
Roer 1 eetlepel suurlemoensap deur.
Bottel kokend warm in warm gesteriliseerde bottels en deksels, seël dadelik.
Geniet.

Resep en foto: Anna Venter