LEKKER KERRIEHOENDER VIR DIE WINTER

Resep getoets en foto: Hannie Steyn
Ek het vanaand hierdie resep probeer en dit is heerlik.

• 1 ui gekap
• olie
• 10 ml kerriepoeier
• ½ klein groen soetrissie in blokkies gesny
• ½ koppie gemengde groente vir kleur
• 2 tamaties, ontvel en in blokkies gesny
• 250 ml rooiwyn, opsioneel, kan vervang met 1 blokkie hoenderekstrak opgelos in kookwater
• 80 ml blatjang
• 25 ml appelkooskonfyt
• 1 kg gaar hoender, gevlok of in blokkies gesny
• 1 eetlepel koekmeel
• 250 ml mayonnaise
• 50 ml room
• 1 sakkie tamatiepasta
• sout en peper na smaak
• Soteer die ui, groen soetrissie en groente in ‘n klein bietjie olie in ‘n matige warm pan op die stoof tot sag.
• Voeg die kerriepoeier by en roerbraai sowat 1 minuut.
• Voeg die tamatie, rooiwyn of hoenderekstrak, blatjang en appelkooskonfyt by en laat sowat 10 minute prut.
• Meng die meel en hoender en voeg dit saam met die mayonnaise, room en tamatiepasta by die mengsel in die pan en verhit tot lekker deurwarm.
• Proe of die smaak reg is en voeg sout en peper na smaak by indien verkies.
• Bedien saam met rys.
• Notas:
• Ek het die rooiwyn uitgelos en die ekstrak gebruik.
• Die tamatiepasta dra by tot ‘n dieper kleur van die gereg.
• Indien verkies, kan jy 2 groot geskilde wortels inrasper by die resep, asook blokkies gaar aartappels.