LEKKER KLAM KOLWYNTJIES (CUPCAKES)

Foto en resep: Daleen Stephens

Probeer gerus hierdie een. Heerlike, klam cupcakes en flop nooit. Jy gaan baie komplimente vir hulle kry. Die geheim: meet bestanddele noukeurig af, gebruik die korrekte grootte eiers, volg instruksies noukeurig en bak slegs 16 minute.

• 4 GROOT eiers (LARGE)
• 15 ml bakpoeier
• 125 ml kookolie
• 125 ml kookwater
• 5 ml vanilla geursel
• 310 ml koekmeel
• 250 ml suiker
• 2,5 ml sout
• 30 ml kakao (vervang met Maizena vir vanilla cupcakes)
• Voorverhit oond tot 180°C.
• Skei eiers (eierwitte in mengbak waarin jy dit later kan styf klits; eiergele in aparte mengbak).
• Voeg kookolie en dán kookwater en vanilla geursel by eiergele en meng goed.
• Meet koekmeel, suiker kakao (óf Maizena) en sout af in mengbak waarin jy lekker kan klits.
• Klits eierwitte styf saam met 10 ml van die bakpoeier en hou eenkant.
• Voeg vloeistofmengsel (met eiergele in) by meelmengsel en klits vinnig totdat al die suiker opgelos is.
• VOU nou styfgeklitste eierwitte en ander 5 ml bakpoeier by meelmengsel in met ‘n lepel, nét tot goed gemeng.
• Plaas die papier cupcake bakkies in ‘n cupcake pan. Skep die deeg in die cupcake bakkies. (vul bakkies so twee derdes vol).
• Bak vir nét 16 minute by 180 °C.