PETRA SE SUURLEMOENSTROOP

Resep en foto:  Petra Venter
Ons suurlemoenboom dra nou weer mooi, dus het ek suurlemoenstroop gemaak. Jy kan die resep ook maklik verminder.

• skil van 5 suurlemoene
• suurlemoensap van 20 suurlemoene (1.25 liter)
• 4 kg wit suiker
• 3.75 liter kookwater
• 5 gehoopte teelepels engelse sout
• 5 gehoopte teelepels wynsteensuur
• Rasper die geel skil van 5 suurlemoene af (nie die wit nie, dit maak dit bitter).
• Plaas die skil, uitgedrukte suurlemoensap, suiker en kookwater in ‘n pot.
• Verhit stadig en roer tot suiker opgelos is teen medium hitte, moenie hitte opdraai voor suiker nie opgelos is nie.
• Verhoog die hitte en bring tot net op kookpunt, maar moenie die stroop laat kook nie.
• Giet die stroop deur ‘n sif, om die skille te verwyder.
• Voeg dadelik die engelse sout en wynsteensuur by die warm stroop en roer dit deur.
• Laat die stroop afkoel en bottel in skoon bottels.
• Nota:
• Ek bêre die stroop in die yskas.
• As ek dit in plastiekbottels sit, stoor ek die ekstra bottels in my vrieskas.
• Die wynsteensuur en engelse sout word gebruik vir preservering, geurbalans en om te verhoed dat die hoë suikerinhoud kristalliseer.
• Om te gebruik: 
• Verdun met yskoue water. Dis heerlik verfrissend!