LEKKER VERLANG HOENDERPASTEI
(So genoem, want die hoender pasteie hier in Australia het nie lekker Boerekos kruie in nie)
- Vulsel:
- 1 groot gekapte ui
- 30 ml olie (Sonneblom)
- 350 g gekapte sampioene
- 2.5 kg hoender (porsies of heel)
- 2 lourier blare
- 2 stokkies kaneel
- 1 teelepel sout
- gerasperde vars neutmuskaat – ek het omtrent 4 raspers gegee
- 250 ml hoender aftreksel, vars of ‘n boeljon blokkie
- 250 ml witwyn (Ek het ‘n soeterige Muskadel in die kas gehad en dit het goed gewerk)
- In ‘n stukkie skoon Muslin toegebind (want ek het my dood gesoek na die klein speserye om dit uit die sousie te haal- nou kan jy net die sakkie uithaal):
- 6 kruie naeltjies
- 12 swartpeper korrels
- Sago vuller:
- 15 ml sago
- louwarm water om te bedek
- 1 eiergeel
- sap van 1 suurlemoen
- 30 ml brandewyn (of voeg ‘n klein bietjie suiker by om die suur te balanseer)
- Kors:
- skilferkors
- eiergeel
- 1 eetlepel melk
Maak die vulsel:
Smoor uie in kookolie.
Voeg sampioene roerbraai en sit eenkant.
Braai hoenderstukke, verkleur in dieselfde kastrol, net verkleur nie gaar nie. (As jy ‘n heel hoender het, sny voor braai)
Sit die uie en sampioene terug saam met die hoender in die pot.
Voeg die wyn, aftreksel en speserye en sout in.
Stowe tot sag en van die bene afval.
Haal die lourierblare, kaneel en die muslin sakkie uit.
Haal die vleis van die beentjies af. (Ek gebruik kos handskoentjies daarvoor) Maak seker jy het al die beentjies en velle verwyder.
Hou die sousies eenkant.
Maak en voeg die sago vuller by:
Week die sago om uit te swel in bietjie water.
Prut tot glaserig in die hoender sousies en haal van die stoof af.
Toets of daar genoeg sout in is en voeg by, indien nodig.
Verdik deur die eiergeel, brandewyn en suurlemoen sap saam te klits – voeg bietjie van die warm vloeistof by die eiers, klits en voeg dan by die res van die mengsel (Onthou eier gaan stol as jy dit by vuurwarm vloeistof gooi – so laat dit so bietjie afkoel en voeg eers ‘n bietjie by om die eier se tempratuur te lig en dan voeg jy dit by die res van die sous)
Korsie:
Skep die verkoelde/koue vulsel in ‘n gesmeerde bak.
Sit die Blaar/Skilfer deeg bo-op. (Doen iets kreatief, sodat dit mooi lyk – rosie of blaartjie of ‘n ding)
Maak ‘n paar gaatjies met ‘n vurk sodat die stoom kan ontsnap.
Verf met geklitste eiergeel en melk.
Bak vir 10 min teen 200°C, draai oond af na 180°C en bak vir ‘n verdere 30 min tot kors mooi bros en goudbruin is.
Nota:
Onthou as jy ‘n waaier oond het draai stel jou temperatuur 10°C laer)
Voetnota:
Tradisioneel kry die pastei nog 2 hard gekookte eiers in skywe gesny en vier skywe ham blokkies, maar dis overkill vir wat ek wil hê. Die ham en eier is baie dekadent, maar maak my pastei bietjie duurder om te maak en is nie so ‘n groot verlies as jy dit uitlaat nie.
Die foto’s is van twee pasteie wat ek vir ‘n vriendin gemaak het wat Republiek toe verlang het. (Dis die resep x 2) Die bakkies is 20 x 13.5 cm.
Ek dink die slap degie wat ek op julle blog gesien het, sal ook lieflik wees. Ek sit graag op ‘n hoender gereg, spinasie en feta driehoekies of Griekse Spanakopita wat ek in die oond gaar maak en dan net bruin maak bo-op ‘n vuurwarm hoender vulsel (sien foto) – baie lekker.
Resep en foto’s: Tani Ras-Devereux
