HOENDERKAASKOEK MET SAMPIOENSOUS

Kors:
½ pakkie Cream Cracker-beskuitjies, fyn gekrummel
90 g (100 ml) botter, gesmelt
2 ml droë gemengde kruie
Vulsel:
30 ml botter
1 ui, fyngekap
30 ml koekmeel
190 ml hoenderaftreksel
190 ml Cheddarkaas, gerasper
5 ml mosterdpoeier
sout en vars gemaalde swartpeper
1 houer (250 g) krummelmaaskaas
3 eiers, geskei
80 ml room
500 ml gaar hoendervleis, in blokkies gesny (vel en bene verwyder)
Bolaag:
30 ml botter
250 g vars sampioene, skyfies gesny
200 – 250 ml room
100 g (250 ml) Cheddarkaas, gerasper
vars pietersielie, fyn gekap

Kors:
Voorverhit oond tot 180ºC en smeer ‘n 20 cm losboompan. Ek bak in die waaier oond teen 160ºC.
Meng beskuitjiekrummels, botter en kruie vir kors deeglik saam. Druk vas op die boom van die pan.
Verkoel tot benodig.

Vulsel:
Smelt botter en soteer ui tot sag. Voeg meel by en braai 2 minute.
Voeg aftreksel geleidelik by en kook tot dik en glad. Voeg kaas, mosterd, sout en peper by.
Klop maaskaas, eiergele en room saam en voeg by kaassous. Voeg hoender by en meng goed.
Klits eierwitte styf en vou by die mengsel in. Skep vulsel in die kors en bak sowat 45 – 60 minute tot gaar en gestol.
Laat afkoel en keer uit op ‘n opdienbord.

Bolaag:
Smelt botter en soteer sampioene tot sag.
Voeg room en kaas by en verhit oor lae hitte tot kaas gesmelt is – die mengsel moenie kook nie!
Skep oor “koek”, sprinkel vars pietersielie oor en bedien warm of koud.

Resep geplaas deur Louise Groenewald
Hoof foto: Martha Coetzee
2de foto: Adam Cloete
3de foto: Yvette Dolphin – ek het die volgende kors gebruik saam met die res van die resep.