EIERLOSE SJOKOLADEKOEK IN DIE MIKROGOLFOOND

Die koek is regtig lekker. Dit was glad nie droog nie. Die versiering was ook nie te soet nie.

1½ koppies koekmeel
¾ koppie suiker
3 teelepels bakpoeier
⅔ koppie kakaopoeier
½ koppie kookolie
1½ koppie warm water

Sif die droë bestanddele saam en meng dit goed. Maak ‘n effense holte in die middel.
Voeg die kookolie en warm water in die holte. Meng goed tot dit glad en glansend is.
(As die deegmengsel te styf is, voeg nog ‘n koppie warm water by, wat ek wel gedoen het).
Plaas waspapier in ‘n mikrogolf ringpan (ek het ‘n Argilla ringpan gebruik en met Spray and Cook gespuit).
Skep die deegmengsel in die voorbereide pan. Skud die pan om die lugborrels te laat ontsnap. Plaas in die mikrogolfoond vir 3 minute op 100% krag.
Toets of die middel nog rou is, en indien nodig plaas vir nog 2 minute in die mikrogolfoond. Toets met ‘n tandestokkie of koek gaar is. Indien nie, plaas terug in mikrogolfoond (ek het dit nog 5 minute lank gebak) tot tandestokkie skoon uitkom.
Plaas die koek eenkant en laat afkoel vir 30 minute. Keer afgekoelde koek uit op oond-rakkie en laat heeltemal afkoel.

Versiering:
280 g semi-soet sjokolade, in blokkies gebreek (ek het ‘n plak donker sjokolade en ‘n plak bruin sjokolade gebruik)
2 houers koue roomkaas
½ koppie suiker

Verhit die sjokolade in 30 sekonde intervalle in die mikrogolfoond totdat dit gesmelt is. Roer na elke 30 sekondes. Moenie oor verhit nie, dan sal dit skei. Laat afkoel tot by kamertemperatuur.

Meng die roomkaas en suiker in ‘n voedselverwerker. Skraap die kante met ‘n spatula, indien nodig. Meng tot ‘n gladde mengsel.

Terwyl die voedselverwerker aan is, voeg die gesmelte sjokolade by die roomkaasmengsel.
Meng tot ‘n gladde mengsel en skraap die kante indien nodig.

Versier die koek met die versiersel en voeg enige ander versiering by. Ek het sjokolade “flakes” en vars bloubessies gebruik, en die holte gevul met bloubessies.

Omdat ek ‘n ringkoek gebak het, het ek net die helfte van die bestanddele wat hier aangedui word, vir die versiering gebruik.

Foto en resep: Hester Engelbrecht